kab kisi ne ki kisi se dil ki baat

kab kisī ne kī kisī se dil kī baat

lab hilā kar ye kahā thā kah dī baat

ik na ik din tum ko aanā hai magar

aaj aate maiñ bhī kahtā apnī baat

tum ne sun lī hai zamāne kī kathā

kyā kahīñ us meñ koī thī merī baat

naam lete hī kahā us ne janāb

baad us ke us ne kī man-bhā.ī baat

un ko da.avā hai ki kahte haiñ vo sach

mujh se kyoñ kahte nahīñ vo sachchī baat

vo na aa.eñ maiñ bhī lauTā kaaf se

sabz pariyoñ kī jahāñ hotī thī baat

mujh se dīvāne ko farzāna kaho

sher meñ ho duur tak jā.egī baat

vo bhī nālāñ maiñ bhī kuchh bezār thā

darmiyāñ phir aa ga.ī ye kaisī baat

sab ko 'īraj' se hai kyūñkar dostī

vo to suntā hī nahīñ hai koī baat

kab kisi ne ki kisi se dil ki baat

lab hila kar ye kaha tha kah di baat

ek na ek din tum ko aana hai magar

aaj aate main bhi kahta apni baat

tum ne sun li hai zamane ki katha

kya kahin us mein koi thi meri baat

nam lete hi kaha us ne janab

baad us ke us ne ki man-bhai baat

un ko dawa hai ki kahte hain wo sach

mujh se kyon kahte nahin wo sachchi baat

wo na aaen main bhi lauTa kaf se

sabz pariyon ki jahan hoti thi baat

mujh se diwane ko farzana kaho

sher mein ho dur tak jaegi baat

wo bhi nalan main bhi kuchh bezar tha

darmiyan phir aa gai ye kaisi baat

sab ko 'iraj' se hai kyunkar dosti

wo to sunta hi nahin hai koi baat