kab lag sake jafa ko uski wafa-e-alam

kab lag sake jafā ko us kī vafā-e-ālam

hai jis kā har karishma sabr-āzmā-e-ālam

muhtāj phir jahāñ meñ koī nazar na aatā

kartā ḳhudā jo mujh ko hājat-ravā-e-ālam

ham ko to kuchh na sūjhā aave vahī dikhā de

dekhā ho gar kisī ne kuchh yā varā-e-ālam

aalam agar hai hādis to mujh ko tū batā de

kyuuñ ab talak hai vo hī nashv-o-numā-e-ālam

koi kuchh hī samjhe is ko par apnī aañkh meñ to

saath is hudūs ke hai sābit baqā-e-ālam

vo bhī nazar meñ apnī is vaqt jalva-gar hai

aalam jo kuchh ki hogā ba.ad-az fanā-e-ālam

āñkheñ to tujh ko dī haiñ Tuk dekh to sahī tū

hai raast kis ke qad par chaspāñ qabā-e-ālam

aalam meñ aur ham meñ ik-tarfa raftagī hai

aalam fidā hai ham par ham haiñ faidā-e-ālam

ham ibtidā kī pūchheñ phir baiTh kar haqīqat

ham ko koī batā de gar intihā-e-ālam

kyā lutf āshiqī kā ab rah gayā hamārī

yaañ āḳhir-e-javānī vaañ ibtidā-e-ālam

kis ġhuncha-lab kī mujh ko yaad aa ga.ī hai is dam

jo tañg ho gayā hai mujh par fazā-e-ālam

aise se dād-ḳhvāhī mahshar meñ bhī sitam hai

har ek ġhamza jis kā ho ḳhūñ-bahā-e-ālam

kab daad ko kisī kī pahuñchā vo rū-e-dilkash

ham ne to us ko paayā hasrat-fazā-e-ālam

jab ālam-e-hayā se begāna vo nigah thī

paate the tab bhī us ko ham āshnā-e-ālam

haiñ 'mus.hafī' ham ab to mānind hādse ke

dekheñ Tale hai kis din sar se balā-e-ālam

kab lag sake jafa ko us ki wafa-e-alam

hai jis ka har karishma sabr-azma-e-alam

muhtaj phir jahan mein koi nazar na aata

karta KHuda jo mujh ko hajat-rawa-e-alam

hum ko to kuchh na sujha aawe wahi dikha de

dekha ho gar kisi ne kuchh ya wara-e-alam

aalam agar hai hadis to mujh ko tu bata de

kyun ab talak hai wo hi nashw-o-numa-e-alam

koi kuchh hi samjhe is ko par apni aankh mein to

sath is hudus ke hai sabit baqa-e-alam

wo bhi nazar mein apni is waqt jalwa-gar hai

aalam jo kuchh ki hoga baad-az fana-e-alam

aankhen to tujh ko di hain Tuk dekh to sahi tu

hai rast kis ke qad par chaspan qaba-e-alam

aalam mein aur hum mein ik-tarfa raftagi hai

aalam fida hai hum par hum hain faida-e-alam

hum ibtida ki puchhen phir baiTh kar haqiqat

hum ko koi bata de gar intiha-e-alam

kya lutf aashiqi ka ab rah gaya hamari

yan aaKHir-e-jawani wan ibtida-e-alam

kis ghuncha-lab ki mujh ko yaad aa gai hai is dam

jo tang ho gaya hai mujh par faza-e-alam

aise se dad-KHwahi mahshar mein bhi sitam hai

har ek ghamza jis ka ho KHun-baha-e-alam

kab dad ko kisi ki pahuncha wo ru-e-dilkash

hum ne to us ko paya hasrat-faza-e-alam

jab aalam-e-haya se begana wo nigah thi

pate the tab bhi us ko hum aashna-e-alam

hain 'mushafi' hum ab to manind hadse ke

dekhen Tale hai kis din sar se bala-e-alam