kab mere vāste koī mushkil nahīñ rahī
kab maut zindagī ke muqābil nahīñ rahī
duniyā kī dostī kā to kyā zikr kījiye
duniyā to dushmanī ke bhī qābil nahīñ rahī
yuuñ merī zindagī hai har ik shai se duur duur
jaise ye kā.enāt meñ shāmil nahīñ rahī
tasvīr-e-inqilāb banā jā rahā huuñ maiñ
ab merī mustaqil koī manzil nahīñ rahī
iz.hār-e-be-vafā-e-duniyā na kījiye
duniyā kisī ke dard meñ shāmil nahīñ rahī
naqshe badal chuke haiñ nizām-e-hayāt ke
kashtī-e-zīst tālib-e-sāhil nahīñ rahī
aayā har ek gaam pe ik inqalāb-e-nau
insāñ kī mustaqil koī manzil nahīñ rahī
ḳhud mushkiloñ ko jis ne gale se lagā liyā
phir us ke vāste koī mushkil nahīñ rahī
'shārib' ye kyā huā ki har ik shai hai ajnabī
vo ham nahīñ rahe ki vo mahfil nahīñ rahī
kab mere waste koi mushkil nahin rahi
kab maut zindagi ke muqabil nahin rahi
duniya ki dosti ka to kya zikr kijiye
duniya to dushmani ke bhi qabil nahin rahi
yun meri zindagi hai har ek shai se dur dur
jaise ye kaenat mein shamil nahin rahi
taswir-e-inqilab bana ja raha hun main
ab meri mustaqil koi manzil nahin rahi
izhaar-e-be-wafa-e-duniya na kijiye
duniya kisi ke dard mein shamil nahin rahi
naqshe badal chuke hain nizam-e-hayat ke
kashti-e-zist talib-e-sahil nahin rahi
aaya har ek gam pe ek inqalab-e-nau
insan ki mustaqil koi manzil nahin rahi
KHud mushkilon ko jis ne gale se laga liya
phir us ke waste koi mushkil nahin rahi
'shaarib' ye kya hua ki har ek shai hai ajnabi
wo hum nahin rahe ki wo mahfil nahin rahi
Source:
Firdaus-e-Nazar (Pg. 33)
-
Author:
Sultan Haider Khan
-
- Publisher: Urdu Acadami U.P
Additional information available
Click on the INTERESTING button to view additional information associated with this sher.
rare Unpublished content
This ghazal contains ashaar not published in the public domain. These are marked by a red line on the left.