kab mili hai nazar hum nahin jaante

kab milī hai nazar ham nahīñ jānte

kab huī hai sahar ham nahīñ jānte

raat hai yā sahar ham nahīñ jānte

kaise hogī basar ham nahīñ jānte

aap haiñ jaan agar to jigar ham bhī haiñ

farq-e-jān-o-jigar ham nahīñ jānte

pūchhnā hai to phir pūchhiye barq se

kyoñ jalā ghar kā ghar ham nahīñ jānte

dekhnā hai jise dekhte haiñ use

ehtiyāt-e-nazar ham nahīñ jānte

ham ne uḌnā hai 'muftī' uḌeñge zarūr

rezish-e-bāl-o-par ham nahīñ jānte

kab mili hai nazar hum nahin jaante

kab hui hai sahar hum nahin jaante

raat hai ya sahar hum nahin jaante

kaise hogi basar hum nahin jaante

aap hain jaan agar to jigar hum bhi hain

farq-e-jaan-o-jigar hum nahin jaante

puchhna hai to phir puchhiye barq se

kyon jala ghar ka ghar hum nahin jaante

dekhna hai jise dekhte hain use

ehtiyat-e-nazar hum nahin jaante

hum ne uDna hai 'mufti' uDenge zarur

rezish-e-baal-o-par hum nahin jaante