kab mohabbat se dekhte hain mujhe

kab mohabbat se dekhte haiñ mujhe

sab zarūrat se dekhte haiñ mujhe

merā nīñdoñ ke saath jhagḌā hai

ḳhvāb hasrat se dekhte haiñ mujhe

jañg jiitī hai kaise ḳhushbū se

phuul hairat se dekhte haiñ mujhe

maiñ to un se bhī pyaar kartā huuñ

jo hiqārat se dekhte haiñ mujhe

saare tiryāk paas haiñ mere

saañp nafrat se dekhte haiñ mujhe

bai.at-e-lafz jab se kī maiñ ne

harf izzat se dekhte haiñ mujhe

maiñ to sahrā kā rahne vaalā huuñ

peḌ qismat se dekhte haiñ mujhe

terā dīdār un kī mazdūrī

jo bhī mehnat se dekhte haiñ

jaane kab chashm-e-nīlgūñ barse

ashk muddat se dekhte haiñ mujhe

kab mohabbat se dekhte hain mujhe

sab zarurat se dekhte hain mujhe

mera nindon ke sath jhagDa hai

KHwab hasrat se dekhte hain mujhe

jang jiti hai kaise KHushbu se

phul hairat se dekhte hain mujhe

main to un se bhi pyar karta hun

jo hiqarat se dekhte hain mujhe

sare tiryak pas hain mere

sanp nafrat se dekhte hain mujhe

baiat-e-lafz jab se ki main ne

harf izzat se dekhte hain mujhe

main to sahra ka rahne wala hun

peD qismat se dekhte hain mujhe

tera didar un ki mazduri

jo bhi mehnat se dekhte hain

jaane kab chashm-e-nilgun barse

ashk muddat se dekhte hain mujhe