kab se baiTha hun iltija ke liye

kab se baiThā huuñ iltijā ke liye

sun lo do bāteñ ab ḳhudā ke liye

faiz-e-māshūq āshiqoñ ko kyā

nik.hat-e-zulf hai sabā ke liye

nā-tavānī meñ nā-tavānī hai

haath uThte nahīñ duā ke liye

ḳhair hai kuchh to is meñ jo chup huuñ

muñh na khulvā.iye ḳhudā ke liye

kyā dil-e-nā-subūr le jā.ūñ

nigah-e-sabr-āzmā ke liye

dar-e-jānāñ kī ḳhaak hai iksīr

dil-e-bīmār kī shifā ke liye

sog meñ dil ke diide phuuT rahe

āshnā ro.e āshnā ke liye

bhes badle hue raqīb kā aaj

maiñ chalā arz-e-mudda.ā ke liye

is taġhāful kī intihā hī nahīñ

koī had chāhiye sazā ke liye

vo bahut munfa.il haiñ dekho 'ḳhayāl'

chhoḌūñ shikvoñ ko ab ḳhudā ke liye

kab se baiTha hun iltija ke liye

sun lo do baaten ab KHuda ke liye

faiz-e-mashuq aashiqon ko kya

nikhat-e-zulf hai saba ke liye

na-tawani mein na-tawani hai

hath uThte nahin dua ke liye

KHair hai kuchh to is mein jo chup hun

munh na khulwaiye KHuda ke liye

kya dil-e-na-subur le jaun

nigah-e-sabr-azma ke liye

dar-e-jaanan ki KHak hai iksir

dil-e-bimar ki shifa ke liye

sog mein dil ke dide phuT rahe

aashna roe aashna ke liye

bhes badle hue raqib ka aaj

main chala arz-e-muddaa ke liye

is taghaful ki intiha hi nahin

koi had chahiye saza ke liye

wo bahut munfail hain dekho 'KHayal'

chhoDun shikwon ko ab KHuda ke liye