kab shauq mera jazbe se bahar na hua tha

kab shauq mirā jazbe se bāhar na huā thā

thā kaun sā qatra jo samundar na huā thā

kyā yaad tirī dil ko mire kar ga.ī tārīk

ik gosha bhī to is kā munavvar na huā thā

kis tarah koī ahd-e-vafā mujh se kare aaj

jab roz-e-azal meñ ye muqaddar na huā thā

dīdār kī hasrat hī huī vaj.h-e-ta.assuf

qismat meñ mirī harf-e-mukarrar na huā thā

āñkhoñ meñ jagah us ko milī vaah re taqdīr

vo qatra jo ḳhush-baḳhtī se gauhar na huā thā

ġharqāb huī kashti-e-hastī lab-e-sāhil

shākir' to abhī us kā shanāvar na huā thā

kab shauq mera jazbe se bahar na hua tha

tha kaun sa qatra jo samundar na hua tha

kya yaad teri dil ko mere kar gai tarik

ek gosha bhi to is ka munawwar na hua tha

kis tarah koi ahd-e-wafa mujh se kare aaj

jab roz-e-azal mein ye muqaddar na hua tha

didar ki hasrat hi hui wajh-e-tassuf

qismat mein meri harf-e-mukarrar na hua tha

aankhon mein jagah us ko mili wah re taqdir

wo qatra jo KHush-baKHti se gauhar na hua tha

gharqab hui kashti-e-hasti lab-e-sahil

shakir' to abhi us ka shanawar na hua tha