kab tak dimagh-e-husn ki naKHwat na jaegi

kab tak dimāġh-e-husn kī naḳhvat na jā.egī

aise to rā.egāñ ye aqīdat na jā.egī

kīkar kī shāḳh ne ye likhā farq-e-qais par

bartī tire junūñ se ri.āyat na jā.egī

mahjūb sā khaḌā huuñ hathelī pe dil liye

is rah se ab kabhī ye ziyārat na jā.egī

dafnā.eñ ham ko dost kitāb-o-qalam samet

zer-e-lahad bhī ziist kī aadat na jā.egī

maskan kiye hue hai kisī kī duā yahāñ

āñkhoñ se jiite jī to ye hairat na jā.egī

'jauhar' gale lago ki milāo hazār haath

likh lo dil-e-shaqī se kudūrat na jā.egī

kab tak dimagh-e-husn ki naKHwat na jaegi

aise to raegan ye aqidat na jaegi

kikar ki shaKH ne ye likha farq-e-qais par

barti tere junun se riayat na jaegi

mahjub sa khaDa hun hatheli pe dil liye

is rah se ab kabhi ye ziyarat na jaegi

dafnaen hum ko dost kitab-o-qalam samet

zer-e-lahad bhi zist ki aadat na jaegi

maskan kiye hue hai kisi ki dua yahan

aankhon se jite ji to ye hairat na jaegi

'jauhar' gale lago ki milao hazar hath

likh lo dil-e-shaqi se kudurat na jaegi