kab tak ghuT kar jite rahte sachchai ke mare KHwab

kab tak ghuT kar jiite rahte sachchā.ī ke maare ḳhvāb

palkoñ kī dahlīz se bāhar nikle phir banjāre ḳhvāb

fitrat se hī āvāra haiñ kab Thahre jo Thahreñge

kaise palkoñ par aTke haiñ kuchh ḳhush-rañg tumhāre ḳhvāb

ab maulā hī jaane in meñ apnā kaun parāyā kaun

hans hans kar har shab milte haiñ yuuñ to itne saare ḳhvāb

jīvan kī is āpā-dhāpī meñ jo pīchhe chhūT ga.e

jaane ab kis haal meñ hoñge vo qismat ke maare ḳhvāb

ta.abīroñ kī fasleñ kaisī ugtī haiñ kal dekheñge

ham ne bhī bo.e haiñ shab bhar rañg-birañge pyāre ḳhvāb

kab 'akhilesh' tavaqqo kī thī barfīlī is ghāTī se

āñkhoñ se barseñge us kī ban kar yuuñ añgāre ḳhvāb

kab tak ghuT kar jite rahte sachchai ke mare KHwab

palkon ki dahliz se bahar nikle phir banjare KHwab

fitrat se hi aawara hain kab Thahre jo Thahrenge

kaise palkon par aTke hain kuchh KHush-rang tumhaare KHwab

ab maula hi jaane in mein apna kaun paraya kaun

hans hans kar har shab milte hain yun to itne sare KHwab

jiwan ki is aapa-dhapi mein jo pichhe chhuT gae

jaane ab kis haal mein honge wo qismat ke mare KHwab

tabiron ki faslen kaisi ugti hain kal dekhenge

hum ne bhi boe hain shab bhar rang-birange pyare KHwab

kab 'akhilesh' tawaqqo ki thi barfili is ghaTi se

aankhon se barsenge us ki ban kar yun angare KHwab