kabhi asar na mere harf-e-muddaa mein raha

kabhī asar na mire harf-e-mudda.ā meñ rahā

na iḳhtiyār koī dast-e-nā-rasā meñ rahā

nasīb-e-duḳhtar-e-havvā jafā-o-jaur-o-sitam

shumār husn-o-nazākat meñ aur vafā meñ rahā

amīr-e-shahr ki thā zo.am-e-eqtidār meñ gum

ġharīb-e-shahr sadā jabr-e-nāravā meñ rahā

utar gayā rag-o-pai meñ vo zahr kī mānind

misāl-e-shahd jo ik shaḳhs ibtidā meñ rahā

maiñ ho sakī na kabhī apnī zaat tak mahdūd

har ek phuul chaman kā mirī duā meñ rahā

maiñ vo marīz huuñ jis ke liye na koī asar

kisī ke harf-e-tasallī meñ aur duā meñ rahā

vo mujh ko dekh ke kartā rahā hai an-dekhā

ajiib tarz-e-taġhāful bhī e'tinā meñ rahā

kabhi asar na mere harf-e-muddaa mein raha

na iKHtiyar koi dast-e-na-rasa mein raha

nasib-e-duKHtar-e-hawwa jafa-o-jaur-o-sitam

shumar husn-o-nazakat mein aur wafa mein raha

amir-e-shahr ki tha zoam-e-eqtidar mein gum

gharib-e-shahr sada jabr-e-narawa mein raha

utar gaya rag-o-pai mein wo zahr ki manind

misal-e-shahd jo ek shaKHs ibtida mein raha

main ho saki na kabhi apni zat tak mahdud

har ek phul chaman ka meri dua mein raha

main wo mariz hun jis ke liye na koi asar

kisi ke harf-e-tasalli mein aur dua mein raha

wo mujh ko dekh ke karta raha hai an-dekha

ajib tarz-e-taghaful bhi e'tina mein raha