kabhi baalon ko suljhaya to hota

kabhī bāloñ ko suljhāyā to hotā

mujhe shāne se uljhāyā to hotā

bigaḌ jaatā abhī muñh aa.ine kā

tumhāre rū-ba-rū aayā to hotā

gul-e-yūsuf zuleḳhā.i dikhātā

chaman meñ vo aziiz aayā to hotā

zabān-e-bosa-e-lab de kar ai yaar

na diide dil ko lalchāyā to hotā

mujhe vāraftagī jaane na detī

va-lekin tum ne bulvāyā to hotā

vo kahte ġhair se kahte par ai dil

zabāñ par mudda.ā laayā to hotā

ruḳh-e-rañgīñ tirā gar dekhtā gul

na uḌ jaatā to pattāyā to hotā

sahāre par sahar hotī shab-e-hijr

na aate va.ada farmāyā to hotā

na paayā tum ko maiñ ne to gilā kyā

kabhī ḳhud aap ko paayā to hotā

masīhā.ī na kartā go vo kāfir

janāze par mire aayā to hotā

na detā le ke dil vo par balā se

mirā dil haath meñ laayā to hotā

maiñ thā gum-karda-e-ishq-e-kamar yaar

kabhī anqā se DhuñDhvāyā to hotā

maiñ kartā shukr-e-muqaddam meñ fidā jaañ

farishta maut kā aayā to hotā

na rahtā dast-e-vahshat āstīñ meñ

junūñ ne paañv phailāyā to hotā

maiñ uḌ chaltā ba-rañg-e-saut-e-nāqūs

'vaqār' us but ne bulvāyā to hotā

kabhi baalon ko suljhaya to hota

mujhe shane se uljhaya to hota

bigaD jata abhi munh aaine ka

tumhaare ru-ba-ru aaya to hota

gul-e-yusuf zuleKHai dikhata

chaman mein wo aziz aaya to hota

zaban-e-bosa-e-lab de kar ai yar

na dide dil ko lalchaya to hota

mujhe waraftagi jaane na deti

wa-lekin tum ne bulwaya to hota

wo kahte ghair se kahte par ai dil

zaban par muddaa laya to hota

ruKH-e-rangin tera gar dekhta gul

na uD jata to pattaya to hota

sahaare par sahar hoti shab-e-hijr

na aate wada farmaya to hota

na paya tum ko main ne to gila kya

kabhi KHud aap ko paya to hota

masihai na karta go wo kafir

janaze par mere aaya to hota

na deta le ke dil wo par bala se

mera dil hath mein laya to hota

main tha gum-karda-e-ishq-e-kamar yar

kabhi anqa se DhunDhwaya to hota

main karta shukr-e-muqaddam mein fida jaan

farishta maut ka aaya to hota

na rahta dast-e-wahshat aastin mein

junun ne panw phailaya to hota

main uD chalta ba-rang-e-saut-e-naqus

'waqar' us but ne bulwaya to hota