kabhi baatil ko haq aur haq ko hum baatil samajhte hain

kabhī bātil ko haq aur haq ko ham bātil samajhte haiñ

murād-e-ahl-e-dil ko sirf ahl-e-dil samajhte haiñ

dil-e-be-mudda.ā hī mudda.ā-e-zīst hai apnā

isī be-hāsilī ko ziist kā hāsil samajhte haiñ

ye terā nuur vo terā makāñ dil kyā nazar kyā hai

nazar ko ham nazar samjhe na dil ko dil samajhte haiñ

kināroñ par jo uThte haiñ vo tūfāñ koī kyā jaane

hameñ to kam-nazar āsūda-e-sāhil samajhte haiñ

yahī apnā aqīda hai koī kuchh bhī kahe ham to

ġhazal kahnā bhī kār-e-ḳhair meñ dāḳhil samajhte haiñ

jilā mahsūs hotī hai 'na.īm' ā.īna-e-dil par

kisī kī ham nigāh-e-lutf ko shāmil samajhte haiñ

kabhi baatil ko haq aur haq ko hum baatil samajhte hain

murad-e-ahl-e-dil ko sirf ahl-e-dil samajhte hain

dil-e-be-muddaa hi muddaa-e-zist hai apna

isi be-hasili ko zist ka hasil samajhte hain

ye tera nur wo tera makan dil kya nazar kya hai

nazar ko hum nazar samjhe na dil ko dil samajhte hain

kinaron par jo uThte hain wo tufan koi kya jaane

hamein to kam-nazar aasuda-e-sahil samajhte hain

yahi apna aqida hai koi kuchh bhi kahe hum to

ghazal kahna bhi kar-e-KHair mein daKHil samajhte hain

jila mahsus hoti hai 'naim' aaina-e-dil par

kisi ki hum nigah-e-lutf ko shamil samajhte hain