kabhi bahaar ka mausam naya dikhai de

kabhī bahār kā mausam nayā dikhā.ī de

gulāb bāteñ kareñ aur sabā dikhā.ī de

shab-e-junūñ hai koī mo.ajiza dikhā.ī de

kisī makāñ kā koī dar khulā dikhā.ī de

maiñ chāhūñ tishna-labī kyā se kyā dikhā.ī de

tamām jū-e-ravāñ aabla dikhā.ī de

tamām shab ke añdhere leñ intiqām agar

charāġh chhīnñe vaalī havā dikhā.ī de

hisār-e-tīra-shabī par nazar jamā.e raho

ajab nahīñ ki koī rāstā dikhā.ī de

batā.e kaun hameñ karb zard mausam kā

shajar meñ koī to pattā harā dikhā.ī de

tū mere zehn pe chhā jaa.e ḳhushbuoñ kī tarah

maiñ phuul dekhūñ sarāpā tirā dikhā.ī de

mizāj aisā bane aap hī kī āñkhoñ ko

bahe kisī kā lahū aap kā dikhā.ī de

vahāñ talāsh na karnā kabhī mujhe 'kāzim'

jahāñ kisī kā koī naqsh-e-pā dikhā.ī de

kabhi bahaar ka mausam naya dikhai de

gulab baaten karen aur saba dikhai de

shab-e-junun hai koi moajiza dikhai de

kisi makan ka koi dar khula dikhai de

main chahun tishna-labi kya se kya dikhai de

tamam ju-e-rawan aabla dikhai de

tamam shab ke andhere len intiqam agar

charagh chhinne wali hawa dikhai de

hisar-e-tira-shabi par nazar jamae raho

ajab nahin ki koi rasta dikhai de

batae kaun hamein karb zard mausam ka

shajar mein koi to patta hara dikhai de

tu mere zehn pe chha jae KHushbuon ki tarah

main phul dekhun sarapa tera dikhai de

mizaj aisa bane aap hi ki aankhon ko

bahe kisi ka lahu aap ka dikhai de

wahan talash na karna kabhi mujhe 'kazim'

jahan kisi ka koi naqsh-e-pa dikhai de