kabhi dusron se Dara diya kabhi apne aap se Dar gaya

kabhī dūsroñ se Darā diyā kabhī apne aap se Dar gayā

mirā saaya saath rahā mire maiñ jahāñ gayā maiñ jidhar gayā

mire dil meñ kitne sarāb haiñ mirī ruuh kā jo azaab hai

unheñ dekh kar maiñ laraz uThā unheñ soch kar maiñ bikhar gayā

mirī ziist kī jo asaas hai mirī saañs mahz qayās hai

mujhe phir bhī jiine kī aas hai maiñ ki Duub Duub ubhar gayā

na maiñ phuul huuñ na maiñ ḳhaar huuñ na nasha huuñ maiñ na ḳhumār huuñ

maiñ to ek musht-e-ġhubār huuñ jo havā chalī to bikhar gayā

mirā naam yuuñ to hai zindagī mujhe maut se milī raushnī

mirī ramz ko vahī pā sakā jo bhī ḳhud se bach ke guzar gayā

na maiñ dhuup huuñ na maiñ daaġh huuñ na mazār kā maiñ charāġh huuñ

maiñ to zindagī kā surāġh huuñ jise tū ḳhalāoñ meñ bhar gayā

maiñ ḳhabar huuñ koī ki ḳhvāb huuñ tire hone kā ki javāb huuñ

maiñ vo dasht dasht sarāb huuñ jo janam ke saath hī mar gayā

kabhi dusron se Dara diya kabhi apne aap se Dar gaya

mera saya sath raha mere main jahan gaya main jidhar gaya

mere dil mein kitne sarab hain meri ruh ka jo azab hai

unhen dekh kar main laraz uTha unhen soch kar main bikhar gaya

meri zist ki jo asas hai meri sans mahz qayas hai

mujhe phir bhi jine ki aas hai main ki Dub Dub ubhar gaya

na main phul hun na main KHar hun na nasha hun main na KHumar hun

main to ek musht-e-ghubar hun jo hawa chali to bikhar gaya

mera nam yun to hai zindagi mujhe maut se mili raushni

meri ramz ko wahi pa saka jo bhi KHud se bach ke guzar gaya

na main dhup hun na main dagh hun na mazar ka main charagh hun

main to zindagi ka suragh hun jise tu KHalaon mein bhar gaya

main KHabar hun koi ki KHwab hun tere hone ka ki jawab hun

main wo dasht dasht sarab hun jo janam ke sath hi mar gaya