kabhi hansate rahe aur kabhi rulate rahe

kabhī hañsāte rahe aur kabhī rulāte rahe

hamāre dost hameñ yuuñ bhī āzmāte rahe

maiñ jheltā hī rahā jin ko dard kī sūrat

vo ek farz samajh kar mujhe nibhāte rahe

jo lauT aa.e na dekhā unhoñ ne muḌ kar bhī

jo Duube haath vahī der tak hilāte rahe

unheñ kabhī na huā fāsloñ kā andāza

har ek samt-e-muḳhālif se vo bulāte rahe

tamām 'umr yahī mas.ala rahā darpesh

vo yaad aate rahe aur ham bhulāte rahe

kahāñ kī qaid kahāñ kī huī nazar-bandī

hazār vasvase har vaqt aate jaate rahe

isī liye to añdhere ḳhafā rahe ham se

ki raushnī ke liye dil bhī ham jalāte rahe

badal ke shakl har ik lamha har ghaḌī 'balrāj'

hamāre saa.e hameñ hī 'abas Darāte rahe

kabhi hansate rahe aur kabhi rulate rahe

hamare dost hamein yun bhi aazmate rahe

main jhelta hi raha jin ko dard ki surat

wo ek farz samajh kar mujhe nibhate rahe

jo lauT aae na dekha unhon ne muD kar bhi

jo Dube hath wahi der tak hilate rahe

unhen kabhi na hua faslon ka andaza

har ek samt-e-muKHalif se wo bulate rahe

tamam 'umr yahi masala raha darpesh

wo yaad aate rahe aur hum bhulate rahe

kahan ki qaid kahan ki hui nazar-bandi

hazar waswase har waqt aate jate rahe

isi liye to andhere KHafa rahe hum se

ki raushni ke liye dil bhi hum jalate rahe

badal ke shakl har ek lamha har ghaDi 'balraj'

hamare sae hamein hi 'abas Daraate rahe