kabhi hanse kabhi aansu bahae tanhai

kabhī hañse kabhī aañsū bahā.e tanhā.ī

hazār tarh mujhe āzmā.e tanhā.ī

na maiñ use na mujhe chhoḌ paa.e tanhā.ī

jahāñ bhī jā.ūñ mire saath jaa.e tanhā.ī

kise pukāriye āvāz dījiye kis ko

yahāñ koī bhī nahīñ hai sivā.e tanhā.ī

rifāqat us kī hamārī bahut purānī hai

ye kaun us se kahe ghar se jaa.e tanhā.ī

hazār chāhā ki ḳhud se milūñ akele meñ

magar huī na judā mujh se haa.e tanhā.ī

udaas chhat dar-o-dīvār chup fazā ḳhāmosh

agar kitābeñ na hoñ kaaT khaa.e tanhā.ī

kabhī jo pyaas ke kāñTe mirī zabāñ pe chubheñ

hazār qahqahe mujh par lagā.e tanhā.ī

'qamar' ye saath koī pāñch das baras kā nahīñ

tamām 'umr chalī saa.e saa.e tanhā.ī

kabhi hanse kabhi aansu bahae tanhai

hazar tarh mujhe aazmae tanhai

na main use na mujhe chhoD pae tanhai

jahan bhi jaun mere sath jae tanhai

kise pukariye aawaz dijiye kis ko

yahan koi bhi nahin hai siwae tanhai

rifaqat us ki hamari bahut purani hai

ye kaun us se kahe ghar se jae tanhai

hazar chaha ki KHud se milun akele mein

magar hui na juda mujh se hae tanhai

udas chhat dar-o-diwar chup faza KHamosh

agar kitaben na hon kaT khae tanhai

kabhi jo pyas ke kanTe meri zaban pe chubhen

hazar qahqahe mujh par lagae tanhai

'qamar' ye sath koi panch das baras ka nahin

tamam 'umr chali sae sae tanhai