kabhi jo dhup hamare makan mein aa jae

kabhī jo dhuup hamāre makāñ meñ aa jaa.e

to sāya-dār shajar bhī amaañ meñ aa jaa.e

maiñ shāhzāda nahīñ to faqīr hī behtar

kahīñ to zikr mirā dāstāñ meñ aa jaa.e

maiñ terā naam salīqe se to pukārūñ magar

ḳhudā-na-ḳhvāsta luknat zabāñ meñ aa jaa.e

kise Dubonā hai aur kis ko paar karnā hai

shu.ūr itnā to āb-e-ravāñ meñ aa jaa.e

maiñ ek lamhe ko sadiyoñ kī zindagī samjhūñ

mirā yaqīñ jo hisār-e-gumāñ meñ aa jaa.e

jhulas chukā hai bahut dhuup meñ badan merā

so us se kahtā huuñ ab sā.ebāñ meñ aa jaa.e

maiñ apnī aql se kuchh aur kaam le lūñgā

kabhī ye dil bhī mirā imtihāñ meñ aa jaa.e

safar kī saarī aziyyat pe ḳhaak uḌtī hai

bhaTak ke koī agar kārvāñ meñ aa jaa.e

maiñ jis ko raaz batātā huuñ apnī ḳhalvat ke

ajab nahīñ ki saf-e-dushmanāñ meñ aa jaa.e

kabhi jo dhup hamare makan mein aa jae

to saya-dar shajar bhi aman mein aa jae

main shahzada nahin to faqir hi behtar

kahin to zikr mera dastan mein aa jae

main tera nam saliqe se to pukarun magar

KHuda-na-KHwasta luknat zaban mein aa jae

kise Dubona hai aur kis ko par karna hai

shuur itna to aab-e-rawan mein aa jae

main ek lamhe ko sadiyon ki zindagi samjhun

mera yaqin jo hisar-e-guman mein aa jae

jhulas chuka hai bahut dhup mein badan mera

so us se kahta hun ab saeban mein aa jae

main apni aql se kuchh aur kaam le lunga

kabhi ye dil bhi mera imtihan mein aa jae

safar ki sari aziyyat pe KHak uDti hai

bhaTak ke koi agar karwan mein aa jae

main jis ko raaz batata hun apni KHalwat ke

ajab nahin ki saf-e-dushmanan mein aa jae