kabhi jo rahte the is shahr mein KHuda ki tarah

kabhī jo rahte the is shahr meñ ḳhudā kī tarah

vo miT ga.e haiñ mire naqsh-hā-e-pā kī tarah

kahāñ thā hosh ki maiñ 'arz-e-mudda.ā kartā

guzar ga.e vo mire paas se havā kī tarah

dhyān tak na diyā mere ham-nashīnoñ ne

maiñ gūñjtā rahā sahrā meñ ik sadā kī tarah

vo jin kī yaad kī ḳhushbū mujhe satātī hai

base hue haiñ mire zehn meñ sabā kī tarah

vafā kī riit hamesha se kuchh nirālī hai

jazā bhī miltī hai is raah meñ sazā kī tarah

kabhī to aao ki dil ko qarār aa jaa.e

chale bhī aao kisī roz to qazā kī tarah

kabhi jo rahte the is shahr mein KHuda ki tarah

wo miT gae hain mere naqsh-ha-e-pa ki tarah

kahan tha hosh ki main 'arz-e-muddaa karta

guzar gae wo mere pas se hawa ki tarah

dhyan tak na diya mere ham-nashinon ne

main gunjta raha sahra mein ek sada ki tarah

wo jin ki yaad ki KHushbu mujhe satati hai

base hue hain mere zehn mein saba ki tarah

wafa ki rit hamesha se kuchh nirali hai

jaza bhi milti hai is rah mein saza ki tarah

kabhi to aao ki dil ko qarar aa jae

chale bhi aao kisi roz to qaza ki tarah