kabhi jo viraniyon mein dekha ghana sa ek bhi shajar nahin hai

kabhī jo vīrāniyoñ meñ dekhā ghanā sā ik bhī shajar nahīñ hai

shajar bhī aise haiñ dekh rakkhe ki jis meñ koī samar nahīñ hai

sabhī nazāre mirī nazar meñ ġhubār ban kar simaT ga.e haiñ

tujhe na aayā nazar to shāyad nazar meñ terī asar nahīñ hai

ajiib hogī havā kī sūrat ġhazab kī hogī havā kī rangat

tujhe bhī is kā pata nahīñ hai mujhe bhī is kī ḳhabar nahīñ hai

vo āsmāñ kā buland manzar ye farsh kī vus.atoñ ko dekho

yahāñ to sab kuchh bashar bashar hai vahāñ pe koī bashar nahīñ hai

ye merī āñkheñ haiñ in meñ dekho samundaroñ kī ravāniyāñ haiñ

tū dekh saktā inheñ musalsal junūn tujh meñ magar nahīñ hai

falak ke uupar hai chāñd raushan zamīn par āftāb raushan

falak ke upar shajar nahīñ hai zamīñ ke uupar qamar nahīñ hai

ka.ī ujāle haiñ din meñ rahte ka.ī ujāle haiñ shab ke andar

vo chāñd taare yahāñ nahīñ hai idhar jo hai vo udhar nahīñ hai

kabhi jo viraniyon mein dekha ghana sa ek bhi shajar nahin hai

shajar bhi aise hain dekh rakkhe ki jis mein koi samar nahin hai

sabhi nazare meri nazar mein ghubar ban kar simaT gae hain

tujhe na aaya nazar to shayad nazar mein teri asar nahin hai

ajib hogi hawa ki surat ghazab ki hogi hawa ki rangat

tujhe bhi is ka pata nahin hai mujhe bhi is ki KHabar nahin hai

wo aasman ka buland manzar ye farsh ki wusaton ko dekho

yahan to sab kuchh bashar bashar hai wahan pe koi bashar nahin hai

ye meri aankhen hain in mein dekho samundaron ki rawaniyan hain

tu dekh sakta inhen musalsal junun tujh mein magar nahin hai

falak ke upar hai chand raushan zamin par aaftab raushan

falak ke upar shajar nahin hai zamin ke upar qamar nahin hai

kai ujale hain din mein rahte kai ujale hain shab ke andar

wo chand tare yahan nahin hai idhar jo hai wo udhar nahin hai