kabhi KHirad ka kabhi ishq ka bahana tha

kabhī ḳhirad kā kabhī ishq kā bahānā thā

mirī hayāt kā maqsad fareb khānā thā

tirī nigāh ko gahrā.iyoñ meñ jaanā thā

mire sukūt kī har tah meñ ik fasānā thā

chaman ke ek hī goshe meñ hai hujūm-e-bahār

ye vo jagah hai jahāñ merā āshiyāna thā

ḳhizāñ kā ḳhauf thā ġhunchoñ ko fasl-e-gul meñ magar

vo muskurā ke rahe jin ko muskurānā thā

jahāñ huā thā unheñ pā-shikastagī kā gumāñ

musāfiroñ ko vahīñ se qadam baḌhānā thā

shab-e-firāq ke maare hue na dekh sake

tulū-e-sub.h kā manzar bahut suhānā thā

vo be-ḳhabar haiñ mohabbat se jo ye kahte haiñ

kisī kī yaad meñ duniyā ko bhuul jaanā thā

jahāñ-jahāñ maiñ rukā vaqt ke qadam bhī ruke

mirā vajūd ḳhud apnī jagah zamāna thā

huzūr-e-husn majāl-e-nazar na thī 'shāhid'

hameñ ḳhud apne muqaddar ko āzmānā thā

kabhi KHirad ka kabhi ishq ka bahana tha

meri hayat ka maqsad fareb khana tha

teri nigah ko gahraiyon mein jaana tha

mere sukut ki har tah mein ek fasana tha

chaman ke ek hi goshe mein hai hujum-e-bahaar

ye wo jagah hai jahan mera aashiyana tha

KHizan ka KHauf tha ghunchon ko fasl-e-gul mein magar

wo muskura ke rahe jin ko muskurana tha

jahan hua tha unhen pa-shikastagi ka guman

musafiron ko wahin se qadam baDhana tha

shab-e-firaq ke mare hue na dekh sake

tulu-e-subh ka manzar bahut suhana tha

wo be-KHabar hain mohabbat se jo ye kahte hain

kisi ki yaad mein duniya ko bhul jaana tha

jahan-jahan main ruka waqt ke qadam bhi ruke

mera wajud KHud apni jagah zamana tha

huzur-e-husn majal-e-nazar na thi 'shahid'

hamein KHud apne muqaddar ko aazmana tha