kabhi KHun hoti hue aur kabhi jalte dekha

Syed Yusuf Ali Khan Nazim

kabhi KHun hoti hue aur kabhi jalte dekha

Syed Yusuf Ali Khan Nazim

MORE BYSyed Yusuf Ali Khan Nazim

    kabhī ḳhuuñ hotī hue aur kabhī jalte dekhā

    dil ko har baar nayā rañg badalte dekhā

    jab ye chāhā ki likheñ vasf-e-safā-e-ruḳh-e-yār

    saf.he par pā-e-qalam ham ne phisalte dekhā

    mai meñ ye baat kahāñ jo tire diide meñ hai

    jis ko dekhā ki girā phir na sambhalte dekhā

    uf re soz-e-dil-e-āshiq ki lahad par us ke

    sañg-e-marmar sifat-e-barf pighalte dekhā

    dil ke lene meñ ye qudarat use allāh na de

    jis ko miTTī ke khilaune pe machalte dekhā

    dil kyā rañg hai tum phir bhī na samjhe afsos

    chashma-e-chashm se ḳhūnāb ubalte dekhā

    hai ye saaqī karāmat ki nahīñ jaam ke paañv

    aur phir bazm meñ sab ne use chalte dekhā

    vā.iz-o-shaiḳh sabhī ḳhuub haiñ kyā batlā.ūñ

    maiñ ne maiḳhāne se kis kis ko nikalte dekhā

    parda kyuuñ kartā hai 'nāzim' tire ghar aa.e the

    raat ko ham ne unheñ bhes badalte dekhā

    kabhi KHun hoti hue aur kabhi jalte dekha

    dil ko har bar naya rang badalte dekha

    jab ye chaha ki likhen wasf-e-safa-e-ruKH-e-yar

    safhe par pa-e-qalam hum ne phisalte dekha

    mai mein ye baat kahan jo tere dide mein hai

    jis ko dekha ki gira phir na sambhalte dekha

    uf re soz-e-dil-e-ashiq ki lahad par us ke

    sang-e-marmar sifat-e-barf pighalte dekha

    dil ke lene mein ye qudarat use allah na de

    jis ko miTTi ke khilaune pe machalte dekha

    dil ka kya rang hai tum phir bhi na samjhe afsos

    chashma-e-chashm se KHunab ubalte dekha

    hai ye saqi ki karamat ki nahin jam ke panw

    aur phir bazm mein sab ne use chalte dekha

    waiz-o-shaiKH sabhi KHub hain kya batlaun

    main ne maiKHane se kis kis ko nikalte dekha

    parda kyun karta hai 'nazim' tere ghar aae the

    raat ko hum ne unhen bhes badalte dekha

    0
    COMMENTS
    VIEW COMMENTS

    Additional information available

    Click on the INTERESTING button to view additional information associated with this sher.

    OKAY

    About this sher

    Lorem ipsum dolor sit amet, consectetur adipiscing elit. Morbi volutpat porttitor tortor, varius dignissim.

    Close

    rare Unpublished content

    This ghazal contains ashaar not published in the public domain. These are marked by a red line on the left.

    OKAY