kabhi kisi se na humne koi gila rakkha

kabhī kisī se na ham ne koī gila rakkhā

hazār zaḳhm sahe aur dil baḌā rakkhā

charāġh yuuñ to sar-e-tāq-e-dil ka.ī the magar

tumhārī lau ko hamesha zarā judā rakkhā

ḳhirad se pūchhā junūñ kā mo.āmla kyā hai

junūñ ke aage ḳhirad kā mo.āmla rakkhā

ḳhayāl ruuh ke ārām se haTāyā nahīñ

jo ḳhaak thā so use ḳhaak meñ milā rakkhā

hazār shukr tirā ai mire ḳhudā-e-junūñ

ki mujh ko rāh-e-ḳhirad se gurez-pā rakkhā

chhapā huā nahīñ tujh se dil-e-tabāh kā haal

ye kam nahīñ ki tire rañj ko bachā rakkhā

vo ek zulf ki lipTī rahī rag-e-jāñ se

vo ik nazar ki hameñ jis ne mubtalā rakkhā

bas ek aan meñ guzrā maiñ kis taġhayyur se

kisī ne sar pe tavajjoh se haath kyā rakkhā

sunā.ī apnī kahānī baḌe salīqe se

kahīñ kahīñ pe fasāne meñ vāqi.a rakkhā

sunā jo shor ki vo shīsha-gar kamāl kā hai

to ham lapak ke ga.e aur qalb jā rakkhā

maiñ jāntā thā ki duniyā jo hai vo hai hī nahīñ

so ḳhud ko ḳhvāhish-e-duniyā se māvarā rakkhā

mire junūñ ne kiye radd vajūd aur adam

alag hī tarah se hone kā silsila rakkhā

ḳhushī sī kis ne hamesha malāl meñ rakkhī

ḳhushī meñ kis ne hamesha malāl sā rakkhā

kabhī na hone diyā tāq-e-dil ko be-raunaq

charāġh ek bujhā aur dūsrā rakkhā

nigāh-dār mirā thā mire sivā na koī

so apnī zaat pe pahrā bahut kaḌā rakkhā

tū paas thā to rahe mahv dekhne meñ tujhe

visāl ko bhī tire hijr par uThā rakkhā

tirā jamāl to tujh par kabhī khulegā nahīñ

hamāre ba.ad batā aa.ine meñ kyā rakkhā

har ek shab thā yahī tere ḳhush-gumān kā haal

diyā bujhāyā nahīñ aur dar khulā rakkhā

hamīñ pe faash kiye rāz-hā-e-harf-o-suḳhan

to phir hameñ hī tamāshā sā kyuuñ banā rakkhā

milā thā ek yahī dil hameñ bhī aap ko bhī

so ham ne ishq rakhā aap ne ḳhudā rakkhā

ḳhizāñ thī aur ḳhizāñ sī ḳhizāñ ḳhudā kī panāh

tirā ḳhayāl thā jis ne harā-bharā rakkhā

jo nā-gahāñ kabhī izn-e-safar huā 'irfān'

to fikr kaisī ki sāmān hai bañdhā rakkhā

kabhi kisi se na hum ne koi gila rakkha

hazar zaKHm sahe aur dil baDa rakkha

charagh yun to sar-e-taq-e-dil kai the magar

tumhaari lau ko hamesha zara juda rakkha

KHirad se puchha junun ka moamla kya hai

junun ke aage KHirad ka moamla rakkha

KHayal ruh ke aaram se haTaya nahin

jo KHak tha so use KHak mein mila rakkha

hazar shukr tera ai mere KHuda-e-junun

ki mujh ko rah-e-KHirad se gurez-pa rakkha

chhapa hua nahin tujh se dil-e-tabah ka haal

ye kam nahin ki tere ranj ko bacha rakkha

wo ek zulf ki lipTi rahi rag-e-jaan se

wo ek nazar ki hamein jis ne mubtala rakkha

bas ek aan mein guzra main kis taghayyur se

kisi ne sar pe tawajjoh se hath kya rakkha

sunai apni kahani baDe saliqe se

kahin kahin pe fasane mein waqia rakkha

suna jo shor ki wo shisha-gar kamal ka hai

to hum lapak ke gae aur qalb ja rakkha

main jaanta tha ki duniya jo hai wo hai hi nahin

so KHud ko KHwahish-e-duniya se mawara rakkha

mere junun ne kiye radd wajud aur adam

alag hi tarah se hone ka silsila rakkha

KHushi si kis ne hamesha malal mein rakkhi

KHushi mein kis ne hamesha malal sa rakkha

kabhi na hone diya taq-e-dil ko be-raunaq

charagh ek bujha aur dusra rakkha

nigah-dar mera tha mere siwa na koi

so apni zat pe pahra bahut kaDa rakkha

tu pas tha to rahe mahw dekhne mein tujhe

visal ko bhi tere hijr par uTha rakkha

tera jamal to tujh par kabhi khulega nahin

hamare baad bata aaine mein kya rakkha

har ek shab tha yahi tere KHush-guman ka haal

diya bujhaya nahin aur dar khula rakkha

hamin pe fash kiye raaz-ha-e-harf-o-suKHan

to phir hamein hi tamasha sa kyun bana rakkha

mila tha ek yahi dil hamein bhi aap ko bhi

so hum ne ishq rakha aap ne KHuda rakkha

KHizan thi aur KHizan si KHizan KHuda ki panah

tera KHayal tha jis ne hara-bhara rakkha

jo na-gahan kabhi izn-e-safar hua 'irfan'

to fikr kaisi ki saman hai bandha rakkha