kabhi mazi kabhi farda se Daraya hai mujhe

kabhī maazī kabhī fardā se Darāyā hai mujhe

kaisā farzānoñ ne dīvāna banāyā hai mujhe

zindagī terī 'ināyāt kā hāsil ye hai

ek qātil hai ki apnā nazar aayā hai mujhe

jaane kyā baat hai tārīḳh ne bādīda-e-tar

merā afsāna ka.ī baar sunāyā hai mujhe

mujh se zulmat-kada-e-ġham kī ‘ināyat pūchho

kitne sāyoñ ke ta’āqub se bachāyā hai mujhe

ab na vo jaam na vo pyaas na vo soz-e-talab

sard jab ho ga.ī mahfil to jagāyā hai mujhe

maiñ na qātil huuñ na maqtūl na munsif yārab

kis liye ‘arsa-e-mehshar meñ bulāyā hai mujhe

mere chehre pe na thiiñ itnī ḳharāsheñ yaaro

tum ne TuuTā huā ā.īna dikhāyā hai mujhe

kal thā masjūd-e-nazar aaj tamāsha huuñ 'shamīm'

kis qayāmat kī bulandī se girāyā hai mujhe

kabhi mazi kabhi farda se Daraya hai mujhe

kaisa farzanon ne diwana banaya hai mujhe

zindagi teri 'inayat ka hasil ye hai

ek qatil hai ki apna nazar aaya hai mujhe

jaane kya baat hai tariKH ne baadida-e-tar

mera afsana kai bar sunaya hai mujhe

mujh se zulmat-kada-e-gham ki ‘inayat puchho

kitne sayon ke ta’aqub se bachaya hai mujhe

ab na wo jam na wo pyas na wo soz-e-talab

sard jab ho gai mahfil to jagaya hai mujhe

main na qatil hun na maqtul na munsif yarab

kis liye ‘arsa-e-mehshar mein bulaya hai mujhe

mere chehre pe na thin itni KHarashen yaro

tum ne TuTa hua aaina dikhaya hai mujhe

kal tha masjud-e-nazar aaj tamasha hun 'shamim'

kis qayamat ki bulandi se giraya hai mujhe