kabhi majbur ho jaana kabhi lachaar ho jaana

kabhī majbūr ho jaanā kabhī lāchār ho jaanā

hameñ lāzim hai goyā tālib-e-dīdār ho jaanā

na jaane bil-mushāfa guftugū par hashr kyā hogā

qayāmat ho gayā jab us se āñkheñ chaar ho jaanā

sukūñ jaatā rahā dil kī tamanna meñ taḌap uThīñ

balā-e-nā-gahānī thā kisī se pyaar ho jaanā

zarā rashk-e-masīhā ho ke mere sāmne aao

ilāj-e-dard-e-dil hai aap kā dīdār ho jaanā

bahāroñ kā karūñ kyoñ intizār ab kyā zarūrat hai

jigar ke daaġh kā mushkil nahīñ gulzār ho jaanā

hameñ le aaya jazb-e-shauq us merāj-e-ulfat par

mayassar aa gayā hai naqsh-bar-dīvār ho jaanā

zahe-qismat huzūr-e-husn izn-e-bāryābī ho

bahut achchhā hai 'jauhar' ā.ina-bardār ho jaanā

kabhi majbur ho jaana kabhi lachaar ho jaana

hamein lazim hai goya talib-e-didar ho jaana

na jaane bil-mushafa guftugu par hashr kya hoga

qayamat ho gaya jab us se aankhen chaar ho jaana

sukun jata raha dil ki tamanna mein taDap uThin

bala-e-na-gahani tha kisi se pyar ho jaana

zara rashk-e-masiha ho ke mere samne aao

ilaj-e-dard-e-dil hai aap ka didar ho jaana

bahaaron ka karun kyon intizar ab kya zarurat hai

jigar ke dagh ka mushkil nahin gulzar ho jaana

hamein le aaya jazb-e-shauq us meraj-e-ulfat par

mayassar aa gaya hai naqsh-bar-diwar ho jaana

zahe-qismat huzur-e-husn izn-e-baryabi ho

bahut achchha hai 'jauhar' aaina-bardar ho jaana