kabhi masjid kabhi mandir se uTha

kabhī masjid kabhī mandir se uThā

ik savālī thā tire dar se uThā

jab bujhā dil meñ charāġh-e-ummīd

ik dhuāñ sā mire andar se uThā

chāñdnī rū-e-zamīñ par phailī

shor tūfāñ kā samundar se uThā

jab luTī apnī matā-e-hastī

ek sho'la sā mire ghar se uThā

vo bhī ik na.ara-e-mastāna thā

jo mire sāya-e-paikar se uThā

kis qayāmat kī ye añgḌā.ī hai

nashsha sā bāda-o-sāġhar se uThā

us kā paikar kabhī mānind-e-salīb

mere har ḳhvāb ke mehvar se uThā

dair meñ jab bhī uThā hai fitna

sanad-e-ḳhair se yā shar se uThā

merī pahchān hai mujh se qaa.em

har-nafas apne hī mehvar se uThā

maiñ jo ik sho.ala-navā shā'ir huuñ

be-sadā bazm-e-suḳhanvar se uThā

kabhi masjid kabhi mandir se uTha

ek sawali tha tere dar se uTha

jab bujha dil mein charagh-e-ummid

ek dhuan sa mere andar se uTha

chandni ru-e-zamin par phaili

shor tufan ka samundar se uTha

jab luTi apni mata-e-hasti

ek sho'la sa mere ghar se uTha

wo bhi ek nara-e-mastana tha

jo mere saya-e-paikar se uTha

kis qayamat ki ye angDai hai

nashsha sa baada-o-saghar se uTha

us ka paikar kabhi manind-e-salib

mere har KHwab ke mehwar se uTha

dair mein jab bhi uTha hai fitna

sanad-e-KHair se ya shar se uTha

meri pahchan hai mujh se qaem

har-nafas apne hi mehwar se uTha

main jo ek shoala-nawa sha'ir hun

be-sada bazm-e-suKHanwar se uTha