kabhi nakaamiyon ka apni hum matam nahin karte

kabhī nākāmiyoñ kā apnī ham mātam nahīñ karte

muqaddar meñ jo ġham likkhe haiñ un kā ġham nahīñ karte

tumhāre naqsh-e-pā par jo nigāheñ apnī rakhte haiñ

vo sar dair-o-haram ke sāmne bhī ḳham nahīñ karte

ghaTāoñ ko barasne kā ishāra hī nahīñ miltā

vo jab tak zulf apne dosh par barham nahīñ karte

masā.il daur-e-hāzir ke haiñ mauzūa-e-ġhazal kuchh yuuñ

ki shā.ir aaj ke zikr-e-gul-o-shabnam nahīñ karte

ise tahzīb-e-ġham kā naam ahl-e-dard dete haiñ

mire aañsū kabhī dāman tumhārā nam nahīñ karte

samajhte haiñ ise ahl-e-nazar sāmān-e-ḳhud-bīnī

shikasta aa.ine kā vo kabhī mātam nahīñ karte

añdheroñ kī shikāyat kyā añdhere phir añdhere haiñ

ujāle bhī sitam is daur meñ kuchh kam nahīñ karte

mohabbat kis se ham karte haiñ kuchh batlā nahīñ sakte

ye hai vo raaz jis meñ dil ko bhī mahram nahīñ karte

fareboñ se kahāñ tak dil ko ham 'āzād' bahlā.eñ

sarāb-e-dasht shiddat tishnagī kī kam nahīñ karte

kabhi nakaamiyon ka apni hum matam nahin karte

muqaddar mein jo gham likkhe hain un ka gham nahin karte

tumhaare naqsh-e-pa par jo nigahen apni rakhte hain

wo sar dair-o-haram ke samne bhi KHam nahin karte

ghaTaon ko barasne ka ishaara hi nahin milta

wo jab tak zulf apne dosh par barham nahin karte

masail daur-e-hazir ke hain mauzua-e-ghazal kuchh yun

ki shair aaj ke zikr-e-gul-o-shabnam nahin karte

ise tahzib-e-gham ka nam ahl-e-dard dete hain

mere aansu kabhi daman tumhaara nam nahin karte

samajhte hain ise ahl-e-nazar saman-e-KHud-bini

shikasta aaine ka wo kabhi matam nahin karte

andheron ki shikayat kya andhere phir andhere hain

ujale bhi sitam is daur mein kuchh kam nahin karte

mohabbat kis se hum karte hain kuchh batla nahin sakte

ye hai wo raaz jis mein dil ko bhi mahram nahin karte

farebon se kahan tak dil ko hum 'azad' bahlaen

sarab-e-dasht shiddat tishnagi ki kam nahin karte