kabhi rauzanon se pukarna kabhi dar ke chaak se dekhna

kabhī rauzanoñ se pukārnā kabhī dar ke chaak se dekhnā

sar-e-bazm us kā kabhī mujhe baḌe inhimāk se dekhnā

agar us ke husn-o-jamāl kā chhiḌe tazkira kabhī bazm meñ

to phir us ke ruḳh pe hijāb ke ka.ī rang paak se dekhnā

ye mirā usuul ġhalat sahī mirī zindagī kī asaas hai

ki jise bhī dekhnā dosto nazar-e-tapāk se dekhnā

mirī tarah lauT ke aa.e jab hai yahī nasīb-e-bahār bhī

gul-o-barg farsh pe muntashir to shajar halāk se dekhnā

kabhī husn-e-paikar-e-zīst par jo nazar paḌe zahe tajziya

to phir ā.inoñ meñ kuchh aks bhī baḌe sharmnāk se dekhnā

hai duā ki quvvat-e-sabr tāqat-e-zabt juzv-e-hayāt ho

yahāñ vāqi.āt qadam qadam haiñ jo ḳhaufnāk se dekhnā

gul-e-nam se paikar-e-zīst meñ hameñ muntaqil jo kiyā gayā

to sabhī manāzir-e-zindagī haiñ nigāh-e-ḳhāk se dekhnā

kabhi rauzanon se pukarna kabhi dar ke chaak se dekhna

sar-e-bazm us ka kabhi mujhe baDe inhimak se dekhna

agar us ke husn-o-jamal ka chhiDe tazkira kabhi bazm mein

to phir us ke ruKH pe hijab ke kai rang pak se dekhna

ye mera usul ghalat sahi meri zindagi ki asas hai

ki jise bhi dekhna dosto nazar-e-tapak se dekhna

meri tarah lauT ke aae jab hai yahi nasib-e-bahaar bhi

gul-o-barg farsh pe muntashir to shajar halak se dekhna

kabhi husn-e-paikar-e-zist par jo nazar paDe zahe tajziya

to phir aainon mein kuchh aks bhi baDe sharmnak se dekhna

hai dua ki quwwat-e-sabr taqat-e-zabt juzw-e-hayat ho

yahan waqiat qadam qadam hain jo KHaufnak se dekhna

gul-e-nam se paikar-e-zist mein hamein muntaqil jo kiya gaya

to sabhi manazir-e-zindagi hain nigah-e-KHak se dekhna