kabhi sahra mein rahte hain kabhi pani mein rahte hain

kabhī sahrā meñ rahte haiñ kabhī paanī meñ rahte haiñ

na jaane kaun hai jis kī nigahbānī meñ rahte haiñ

zamīñ se āsmāñ tak apne hone kā tamāshā hai

ye saare silsile ik lamha-e-fānī meñ rahte haiñ

saverā hote hote roz aa jaate haiñ sāhil par

safīne raat bhar dariyā kī tuġhyānī meñ rahte haiñ

patā āñkheñ ko miltā hai yahīñ sab jaane vāloñ kā

sabhī is ā.īna-ḳhāne kī hairānī meñ rahte haiñ

idhar ham haiñ ki har kār-e-jahāñ dushvār hai ham ko

udhar kuchh log har mushkil kī āsānī meñ rahte haiñ

kise ye niilī piilī titliyāñ achchhī nahīñ lagtīñ

'ajab kyā hai jo ham bachchoñ kī nādānī meñ rahte haiñ

yahī be-chehra o be-nām ghar apnā Thikāna hai

ham ik bhūle hue manzar kī vīrānī meñ rahte haiñ

kabhi sahra mein rahte hain kabhi pani mein rahte hain

na jaane kaun hai jis ki nigahbani mein rahte hain

zamin se aasman tak apne hone ka tamasha hai

ye sare silsile ek lamha-e-fani mein rahte hain

sawera hote hote roz aa jate hain sahil par

safine raat bhar dariya ki tughyani mein rahte hain

pata aankhen ko milta hai yahin sab jaane walon ka

sabhi is aaina-KHane ki hairani mein rahte hain

idhar hum hain ki har kar-e-jahan dushwar hai hum ko

udhar kuchh log har mushkil ki aasani mein rahte hain

kise ye nili pili titliyan achchhi nahin lagtin

'ajab kya hai jo hum bachchon ki nadani mein rahte hain

yahi be-chehra o be-nam ghar apna Thikana hai

hum ek bhule hue manzar ki virani mein rahte hain