kabhi sarsar hai kabhi baad-e-saba hai saqi

kabhī sarsar hai kabhī bād-e-sabā hai saaqī

zindagī silsila-e-bīm-o-rajā hai saaqī

na kudūrat hai kisī se na gila hai saaqī

maiñ ne ḳhud apne muqaddar ko likhā hai saaqī

apne māhaul meñ shāmil huuñ maiñ auroñ kī tarah

mere jiine kā magar taur judā hai saaqī

merā chehra mire jazbāt kā akkās nahīñ

merā dil dekh jahāñ hashr bapā hai saaqī

kuchh kaheñ ahl-e-ḳhirad fikr nahīñ hai mujh ko

mere a.amāl ḳhudā dekh rahā hai saaqī

muftī-o-mohtasib-o-vā.iz-o-qāzī-o-faqīh

terī āñkhoñ se kahīñ koī bachā hai saaqī

vāqif-e-rāz hai mai-ḳhāna-e-hastī kā 'na.īm'

us ke hoñToñ pe magar qufl-e-vafā hai saaqī

kabhi sarsar hai kabhi baad-e-saba hai saqi

zindagi silsila-e-bim-o-raja hai saqi

na kudurat hai kisi se na gila hai saqi

main ne KHud apne muqaddar ko likha hai saqi

apne mahaul mein shamil hun main auron ki tarah

mere jine ka magar taur juda hai saqi

mera chehra mere jazbaat ka akkas nahin

mera dil dekh jahan hashr bapa hai saqi

kuchh kahen ahl-e-KHirad fikr nahin hai mujh ko

mere aamal KHuda dekh raha hai saqi

mufti-o-mohtasib-o-waiz-o-qazi-o-faqih

teri aankhon se kahin koi bacha hai saqi

waqif-e-raaz hai mai-KHana-e-hasti ka 'naim'

us ke honTon pe magar qufl-e-wafa hai saqi