kabhi sukun to kabhi iztirab jaisa hai

kabhī sukūñ to kabhī iztirāb jaisā hai

ab us kā milnā-milānā bhī ḳhvāb jaisā hai

ye tishnagī-e-mohabbat na bujh sakegī kabhī

ye mat kaho ki ye dariyā sarāb jaisā hai

ġhamoñ kī dhuup meñ ummīd ke bhī saa.e huuñ

tū zindagī meñ yahī inqalāb jaisā hai

kabhī ḳhayāl se bāhar kabhī ḳhayāl meñ hai

vo ek chehra jo dil meñ gulāb jaisā hai

koī mile na mile be-qarār rahtā hai

ki dil kā haal bhī ik mauj-e-āb jaisā hai

hamāre dil meñ vahī hai jo sab pe zāhir hai

ki apnā chehra khulī ik kitāb jaisā hai

vo jis kī zaat se jiine kā lutf thā 'nādir'

bichhaḌ gayā to ye jiinā azaab jaisā hai

kabhi sukun to kabhi iztirab jaisa hai

ab us ka milna-milana bhi KHwab jaisa hai

ye tishnagi-e-mohabbat na bujh sakegi kabhi

ye mat kaho ki ye dariya sarab jaisa hai

ghamon ki dhup mein ummid ke bhi sae hun

tu zindagi mein yahi inqalab jaisa hai

kabhi KHayal se bahar kabhi KHayal mein hai

wo ek chehra jo dil mein gulab jaisa hai

koi mile na mile be-qarar rahta hai

ki dil ka haal bhi ek mauj-e-ab jaisa hai

hamare dil mein wahi hai jo sab pe zahir hai

ki apna chehra khuli ek kitab jaisa hai

wo jis ki zat se jine ka lutf tha 'nadir'

bichhaD gaya to ye jina azab jaisa hai