kabhi su-e-manzil jo hum dekhte hain

kabhī sū-e-manzil jo ham dekhte haiñ

tumhāre hī naqsh-e-qadam dekhte haiñ

tirī aañkh meñ apnā ġham dekhte haiñ

zamāne meñ aisā to kam dekhte haiñ

bharī bazm meñ aaj ik dūsre ko

na tum dekhte ho na ham dekhte haiñ

baḌe log karte haiñ jo kārnāme

unheñ pattharoñ ke sanam dekhte haiñ

javāñ azm rakhte haiñ rāh-e-vafā meñ

kahāñ ham ye thakte qadam dekhte haiñ

vatīra hai jin kā yahī zohd-o-taqvā

tasavvur meñ shāh-e-umam dekhte haiñ

jo uljhe hue haiñ ġham-e-zindagī meñ

tirī zulf-e-barham ke ḳham dekhte haiñ

tabī.at meñ jin kī koī maslahat ho

vo chalne se pahle qadam dekhte haiñ

mohabbat hai 'anvār' ta.amīr-e-ālam

mohabbat se har shai ko ham dekhte haiñ

kabhi su-e-manzil jo hum dekhte hain

tumhaare hi naqsh-e-qadam dekhte hain

teri aankh mein apna gham dekhte hain

zamane mein aisa to kam dekhte hain

bhari bazm mein aaj ek dusre ko

na tum dekhte ho na hum dekhte hain

baDe log karte hain jo karname

unhen pattharon ke sanam dekhte hain

jawan azm rakhte hain rah-e-wafa mein

kahan hum ye thakte qadam dekhte hain

watira hai jin ka yahi zohd-o-taqwa

tasawwur mein shah-e-umam dekhte hain

jo uljhe hue hain gham-e-zindagi mein

teri zulf-e-barham ke KHam dekhte hain

tabiat mein jin ki koi maslahat ho

wo chalne se pahle qadam dekhte hain

mohabbat hai 'anwar' tamir-e-alam

mohabbat se har shai ko hum dekhte hain