kabhi to hum is zamin pe bikhre hue nazaron ko aam karte

kabhī to ham is zamīñ pe bikhre hue nazāroñ ko 'aam karte

agar na mil paatā ham ko sūraj to chāñd tāroñ ko 'aam karte

rah-e-vafā meñ vafā milegī ye sochnā bhī fuzūl hī thā

na karte sūd-o-ziyāñ kā charchā to kyā ḳhasāroñ ko 'aam karte

hameñ jo mil jātīñ manzileñ ham sabhī ko rasta batā hī dete

jo manziloñ kā husūl hotā to rahguzāroñ ko 'aam karte

kabhī jo raste meñ koī patthar milā haTā kar hī aage aa.e

ye apnī fitrat meñ hī nahīñ thā ki kohsāroñ ko 'aam karte

tumhārī mā'sūmiyat kā ham ko bharam thā rakhnā har ek sūrat

nahīñ the kam-zarf itne ham ki tire ishāroñ ko 'aam karte

ġhamoñ kī jholī meñ ham ne kuchh kuchh ḳhushī ke lamhe bhī rakh diye haiñ

nahīñ to palḌā palaT hī jaatā jo intishāroñ ko 'aam karte

ho kaam koī bhī kitnā mushkil kabhī na maanī thī haar ham ne

zamīñ kī chhātī darak jo jaatī to ābshāroñ ko 'aam karte

jo chāhte to dikhā bhī sakte the apne zaḳhmoñ ko ham ‘tamannā’

magar nahīñ thā hameñ gavārā ki un ke vāroñ ko 'aam karte

kabhi to hum is zamin pe bikhre hue nazaron ko 'am karte

agar na mil pata hum ko suraj to chand taron ko 'am karte

rah-e-wafa mein wafa milegi ye sochna bhi fuzul hi tha

na karte sud-o-ziyan ka charcha to kya KHasaron ko 'am karte

hamein jo mil jatin manzilen hum sabhi ko rasta bata hi dete

jo manzilon ka husul hota to rahguzaron ko 'am karte

kabhi jo raste mein koi patthar mila haTa kar hi aage aae

ye apni fitrat mein hi nahin tha ki kohsaron ko 'am karte

tumhaari ma'sumiyat ka hum ko bharam tha rakhna har ek surat

nahin the kam-zarf itne hum ki tere ishaaron ko 'am karte

ghamon ki jholi mein hum ne kuchh kuchh KHushi ke lamhe bhi rakh diye hain

nahin to palDa palaT hi jata jo intishaaron ko 'am karte

ho kaam koi bhi kitna mushkil kabhi na mani thi haar hum ne

zamin ki chhati darak jo jati to aabshaaron ko 'am karte

jo chahte to dikha bhi sakte the apne zaKHmon ko hum ‘tamanna’

magar nahin tha hamein gawara ki un ke waron ko 'am karte