kabhi to mund len aanKHen kabhi nazar kholen

kabhī to muuñd leñ āñḳheñ kabhī nazar kholeñ

kisī tarah se koī raushnī kā dar kholeñ

havā.eñ sard haiñ uupar se tez bārish hai

parind kaise bhalā apne bāl-o-par kholeñ

hamāre sāmne ab aisā vaqt aa pahuñchā

ki ham dimāġh ko bāñdheñ dil-o-jigar kholeñ

bajā.e aab ho shorāb se numū jin kī

vo peḌ kaise baḌheñ kaise barg-o-bar kholeñ

yaqīn kaise dilā.eñ vafā-shi.ārī kā

diloñ ko chaak kareñ yā ki ham jigar kholeñ

nahīñ hai kuchh bhī magar dil ye chāhtā hai bahut

ki ek roz zarā chal ke apnā ghar kholeñ

har ek samt hai dīvār sar uThā.e hue

koī batā.e ki ham khiḌkiyāñ kidhar kholeñ

har ek aañkh kī putlī hai motiyā kī shikār

kise kamāl dikhā.eñ kahāñ hunar kholeñ

kabhi to mund len aanKHen kabhi nazar kholen

kisi tarah se koi raushni ka dar kholen

hawaen sard hain upar se tez barish hai

parind kaise bhala apne baal-o-par kholen

hamare samne ab aisa waqt aa pahuncha

ki hum dimagh ko bandhen dil-o-jigar kholen

bajae aab ho shorab se numu jin ki

wo peD kaise baDhen kaise barg-o-bar kholen

yaqin kaise dilaen wafa-shiari ka

dilon ko chaak karen ya ki hum jigar kholen

nahin hai kuchh bhi magar dil ye chahta hai bahut

ki ek roz zara chal ke apna ghar kholen

har ek samt hai diwar sar uThae hue

koi batae ki hum khiDkiyan kidhar kholen

har ek aankh ki putli hai motiya ki shikar

kise kamal dikhaen kahan hunar kholen