kabhi to rang-e-husn-e-yar dekhun

kabhī to rañg-e-husn-e-yār dekhūñ

kahāñ tak dīda-e-ḳhūñ-bār dekhūñ

vahī dekhūñ jise dekhā na jaa.e

ye manzar aur kitnī baar dekhūñ

palak jhapkūñ to phir in pattharoñ meñ

kahāñ aise mohabbat-zār dekhūñ

kisī kā zaḳhm-e-dil dekhā na jaa.e

jigar ho to koī shahkār dekhūñ

kamāneñ TūTtī dekhī haiñ maiñ ne

ginūñ bāheñ ki lipTe haar dekhūñ

kisī ko is tarah dekhūñ to ro.uuñ

maiñ kaise apnā hāl-e-zār dekhūñ

diloñ ke sab ghaḌe kachche haiñ 'kausar'

maiñ kis kī raah dariyā paar dekhūñ

kabhi to rang-e-husn-e-yar dekhun

kahan tak dida-e-KHun-bar dekhun

wahi dekhun jise dekha na jae

ye manzar aur kitni bar dekhun

palak jhapkun to phir in pattharon mein

kahan aise mohabbat-zar dekhun

kisi ka zaKHm-e-dil dekha na jae

jigar ho to koi shahkar dekhun

kamanen TuTti dekhi hain main ne

ginun bahen ki lipTe haar dekhun

kisi ko is tarah dekhun to roun

main kaise apna haal-e-zar dekhun

dilon ke sab ghaDe kachche hain 'kausar'

main kis ki rah dariya par dekhun