kabhi to sans teri yaad se juda nikle

kabhī to saañs tirī yaad se judā nikle

hamārī shab ke muqaddar se ratjagā nikle

ajab nahīñ ki mire baad merā kul tarka

harā-bharā sā bas ik zaḳhm aur diyā nikle

bhañvar ne gher liyā hai so bach na pā.ūñgā

ye ishq khel nahīñ hai ki rāsta nikle

yahāñ to bolte rahnā bahut zarūrī hai

suḳhan ke shahr meñ gūñge kidhar se aa nikle

tumhārī aah pe mātam-ba-dast hai duniyā

hamāre dard pe har muñh se qahqaha nikle

vo ḳhvāb niiñd kī suulī pe bain kartā hai

jo surḳh aañkh kī zad se mirā havā nikle

hamāre chāhne vāloñ ko ham se shikva hai

samajh rahe the vo patthar ham ā.īna nikle

kabhi to sans teri yaad se juda nikle

hamari shab ke muqaddar se ratjaga nikle

ajab nahin ki mere baad mera kul tarka

hara-bhara sa bas ek zaKHm aur diya nikle

bhanwar ne gher liya hai so bach na paunga

ye ishq khel nahin hai ki rasta nikle

yahan to bolte rahna bahut zaruri hai

suKHan ke shahr mein gunge kidhar se aa nikle

tumhaari aah pe matam-ba-dast hai duniya

hamare dard pe har munh se qahqaha nikle

wo KHwab nind ki suli pe bain karta hai

jo surKH aankh ki zad se mera hawa nikle

hamare chahne walon ko hum se shikwa hai

samajh rahe the wo patthar hum aaina nikle