kabhi to sochna tum un udas aankhon ka

kabhī to sochnā tum un udaas āñkhoñ kā

ye ratjagoñ meñ ghirī mahv-e-yās āñkhoñ kā

maiñ ghar ga.ī thī kahīñ vahshatoñ ke jangal meñ

thā ik hujūm mire aas paas āñkhoñ kā

barahnagī tire andar kahīñ panaptī hai

libās DhūñD koī be-libās āñkhoñ kā

tumhāre hijr kā mausam hī raas aayā mujhe

yahī thā ek tabī.at-shanās āñkhoñ kā

usī kī nazr sabhī ratjage sabhī nīñdeñ

aur us kī āñkhoñ ke naam iqtibās āñkhoñ kā

paḌī rahe tirī tasvīr sāmne yūñhī

ye zar khilā rahe āñkhoñ ke paas āñkhoñ kā

ḳhayāl thā ki vo abr is taraf se guzregā

so ye bhī 'jānāñ' thā vahm-o-qayās āñkhoñ kā

kabhi to sochna tum un udas aankhon ka

ye ratjagon mein ghiri mahw-e-yas aankhon ka

main ghar gai thi kahin wahshaton ke jangal mein

tha ek hujum mere aas pas aankhon ka

barahnagi tere andar kahin panapti hai

libas DhunD koi be-libas aankhon ka

tumhaare hijr ka mausam hi ras aaya mujhe

yahi tha ek tabiat-shanas aankhon ka

usi ki nazr sabhi ratjage sabhi ninden

aur us ki aankhon ke nam iqtibas aankhon ka

paDi rahe teri taswir samne yunhi

ye zar khila rahe aankhon ke pas aankhon ka

KHayal tha ki wo abr is taraf se guzrega

so ye bhi 'jaanan' tha wahm-o-qayas aankhon ka