kabhi tu ne KHud bhi socha ki ye pyas hai to kyun hai

kabhī tū ne ḳhud bhī sochā ki ye pyaas hai to kyuuñ hai

tujhe pā ke bhī mirā dil jo udaas hai to kyuuñ hai

mujhe kyuuñ azīz-tar hai ye dhuāñ dhuāñ sā mausam

ye havā-e-shām-e-hijrāñ mujhe raas hai to kyuuñ hai

tujhe kho ke sochtā huuñ mire dāman-e-talab meñ

koī ḳhvāb hai to kyuuñ hai koī aas hai to kyuuñ hai

maiñ ujaḌ ke bhī huuñ terā tū bichhaḌ ke bhī hai merā

ye yaqīn hai to kyuuñ hai ye qayās hai to kyuuñ hai

mire tan barahna-dushman isī ġham meñ ghul rahe haiñ

ki mire badan pe sālim ye libās hai to kyuuñ hai

kabhī pūchh us ke dil se ki ye ḳhush-mizāj shā.ir

bahut apnī shā.irī meñ jo udaas hai to kyuuñ hai

tirā kis ne dil bujhāyā mire 'e.atibār-sājid'

ye charāġh-e-hijr ab tak tire paas hai to kyuuñ hai

kabhi tu ne KHud bhi socha ki ye pyas hai to kyun hai

tujhe pa ke bhi mera dil jo udas hai to kyun hai

mujhe kyun aziz-tar hai ye dhuan dhuan sa mausam

ye hawa-e-sham-e-hijran mujhe ras hai to kyun hai

tujhe kho ke sochta hun mere daman-e-talab mein

koi KHwab hai to kyun hai koi aas hai to kyun hai

main ujaD ke bhi hun tera tu bichhaD ke bhi hai mera

ye yaqin hai to kyun hai ye qayas hai to kyun hai

mere tan barahna-dushman isi gham mein ghul rahe hain

ki mere badan pe salim ye libas hai to kyun hai

kabhi puchh us ke dil se ki ye KHush-mizaj shair

bahut apni shairi mein jo udas hai to kyun hai

tera kis ne dil bujhaya mere 'eatibar-sajid'

ye charagh-e-hijr ab tak tere pas hai to kyun hai