kabhi wafaen kabhi bewafaiyan dekhin

kabhī vafā.eñ kabhī bevafā.iyāñ dekhīñ

maiñ un butoñ kī ġharaz āshnā.iyāñ dekhīñ

ham uTh chale jo kabhī us galī ko vahshat meñ

to us ghaḌī na kueñ aur na khā.iyāñ dekhīñ

zahe nasīb haiñ us ke ki jis ne vasl kī shab

gale meñ apne vo nāzuk kalā.iyāñ dekhīñ

ye satah-e-ḳhāk hai kyā razm-gāh kā maidān

ki jis pe hotī huī nit laḌā.iyāñ dekhīñ

galī meñ us kī ye bāzār-e-marg garm huā

ki daad ḳhvāhoñ kī vaañ chārpā.iyāñ dekhīñ

rakhā na ḳhat kabhī aariz pe us parī-rū ne

ba-rañg-e-ā.īna nit vaañ safā.iyāñ dekhīñ

hunūz jiite rahe haiñ to saḳht-jānī se

vagarna ham ne bhī kyā kyā judā.iyāñ dekhīñ

na haath aa.ī mire 'mus.hafī' vo zulf-e-rasā

maiñ tāle.oñ kī bhī apne rasā.iyāñ dekhīñ

kabhi wafaen kabhi bewafaiyan dekhin

main un buton ki gharaz aashnaiyan dekhin

hum uTh chale jo kabhi us gali ko wahshat mein

to us ghaDi na kuen aur na khaiyan dekhin

zahe nasib hain us ke ki jis ne wasl ki shab

gale mein apne wo nazuk kalaiyan dekhin

ye satah-e-KHak hai kya razm-gah ka maidan

ki jis pe hoti hui nit laDaiyan dekhin

gali mein us ki ye bazar-e-marg garm hua

ki dad KHwahon ki wan chaarpaiyan dekhin

rakha na KHat kabhi aariz pe us pari-ru ne

ba-rang-e-aina nit wan safaiyan dekhin

hunuz jite rahe hain to saKHt-jaani se

wagarna hum ne bhi kya kya judaiyan dekhin

na hath aai mere 'mushafi' wo zulf-e-rasa

main taleon ki bhi apne rasaiyan dekhin