kabhi zamin pe kabhi nile aasman mein hun

kabhī zamīñ pe kabhī niile āsmān meñ huuñ

havā kī tarah maiñ har pal na.e makān meñ huuñ

tirā vaqār to mere hī dam se qaa.em hai

maiñ misl-e-āb-e-guhar terī ān-bān meñ huuñ

laboñ se us ke nikal kar huā huuñ āvāra

maiñ ek lafz huuñ har-dam na.ī uḌaan meñ huuñ

mujhe to gahre samundar se jā ke milnā hai

abhī maiñ ruk nahīñ saktā abhī Dhalān meñ huuñ

samajh tū mujh ko zarā merī qadr kar nādāñ

maiñ āsmānī sahīfa tirī zabān meñ huuñ

mire hisār meñ thī saarī kā.enāt kabhī

sitam hai qaid maiñ ḳhud apne hī makān meñ huuñ

agar hai shauq to mujh ko ḳharīd le aakar

ki maiñ to shahr-e-havas kī har ik dukān meñ huuñ

kabhi zamin pe kabhi nile aasman mein hun

hawa ki tarah main har pal nae makan mein hun

tera waqar to mere hi dam se qaem hai

main misl-e-ab-e-guhar teri aan-ban mein hun

labon se us ke nikal kar hua hun aawara

main ek lafz hun har-dam nai uDan mein hun

mujhe to gahre samundar se ja ke milna hai

abhi main ruk nahin sakta abhi Dhalan mein hun

samajh tu mujh ko zara meri qadr kar nadan

main aasmani sahifa teri zaban mein hun

mere hisar mein thi sari kaenat kabhi

sitam hai qaid main KHud apne hi makan mein hun

agar hai shauq to mujh ko KHarid le aakar

ki main to shahr-e-hawas ki har ek dukan mein hun