kaDi dhup ka safar hai koi saeban nahin hai

kaḌī dhuup kā safar hai koī sā.ebāñ nahīñ hai

rakhe sar pe haath aisā koī mehrbāñ nahīñ hai

mire us ke biich haa.il ka.ī parde haiñ ba-zāhir

magar asl meñ hamāre koī darmiyāñ nahīñ hai

maiñ ne vaqt ke varaq par kabhī likkhī thī kahānī

jise sun ke ro paḌe tum mirī dāstāñ nahīñ hai

mire lafz be-sadā haiñ mirī mahfileñ haiñ vīrāñ

mujhe lag rahā hai jaise mirā ham-zabāñ nahīñ hai

unhī dostoñ ne mil kar mire ghar ko phūñk Daalā

vo jo kah rahe the zad pe tirā āshiyāñ nahīñ hai

tū ne un ke hukm-e-shar pe na 'amal kiyā to sun le

ye zamīñ tirī nahīñ hai tirā āsmāñ nahīñ hai

tirā ġham jo muddatoñ se mire dil kī aabrū hai

mire āñsuoñ se vo bhī abhī bad-gumāñ nahīñ hai

kaDi dhup ka safar hai koi saeban nahin hai

rakhe sar pe hath aisa koi mehrban nahin hai

mere us ke bich hail kai parde hain ba-zahir

magar asl mein hamare koi darmiyan nahin hai

main ne waqt ke waraq par kabhi likkhi thi kahani

jise sun ke ro paDe tum meri dastan nahin hai

mere lafz be-sada hain meri mahfilen hain viran

mujhe lag raha hai jaise mera ham-zaban nahin hai

unhi doston ne mil kar mere ghar ko phunk Dala

wo jo kah rahe the zad pe tera aashiyan nahin hai

tu ne un ke hukm-e-shar pe na 'amal kiya to sun le

ye zamin teri nahin hai tera aasman nahin hai

tera gham jo muddaton se mere dil ki aabru hai

mere aansuon se wo bhi abhi bad-guman nahin hai