kaha kis ne ki gham-KHwari karega

kahā kis ne ki ġham-ḳhvārī karegā

vo banda bas adākārī karegā

zamīn-e-dil pe boyā karb us ne

maiñ samjhā thā ki dildārī karegā

maiñ us ke lab pe ġhazleñ kah rahā huuñ

use kahnā sadā-kārī karegā

utārūñgā ye poshāk-e-siyah kab

ye dil kab tak azā-dārī karegā

amaañ ho jaan kī zill-e-ilāhī

tujhe barbād darbārī karegā

jo sar mansūb hogā daar se ab

qabīle kī vo sardārī karegā

usī ke bachchoñ ko chhāñv milegī

yahāñ ab jo shajar-kārī karegā

kaha kis ne ki gham-KHwari karega

wo banda bas adakari karega

zamin-e-dil pe boya karb us ne

main samjha tha ki dildari karega

main us ke lab pe ghazlen kah raha hun

use kahna sada-kari karega

utarunga ye poshak-e-siyah kab

ye dil kab tak aza-dari karega

aman ho jaan ki zill-e-ilahi

tujhe barbaad darbari karega

jo sar mansub hoga dar se ab

qabile ki wo sardari karega

usi ke bachchon ko chhanw milegi

yahan ab jo shajar-kari karega