kaha na kuchh bhi daba di gai meri aawaz

kahā na kuchh bhī dabā dī ga.ī mirī āvāz

uḌā na thā ki shikasta hue par-e-parvāz

ajiib qaid meñ dam hai ye kaisā jiinā hai

ki zindagī huī jaatī hai maut kī ġhammāz

taḌap taḌap ke sar-e-dār mar gayā koī

hayāt kahiye ki marne hī kā hai ik andāz

jigar kā soz mayassar nahīñ to kuchh bhī nahīñ

jigar ke soz se sāz-e-hayāt bā-āvāz

koī salīb pe kyā soch ke laTaktā hai

masīh-e-vaqt se pūchhe zarā koī ye raaz

firāq-e-yār meñ har lamha zindagī hai azaab

darāz silsila-e-zīst hai bahut hī darāz

ġham-e-hayāt ne shā.ir banā diyā 'ḳhurshīd'

vagarna maiñ kahāñ aur shā.irī kā ye e.azāz

kaha na kuchh bhi daba di gai meri aawaz

uDa na tha ki shikasta hue par-e-parwaz

ajib qaid mein dam hai ye kaisa jina hai

ki zindagi hui jati hai maut ki ghammaz

taDap taDap ke sar-e-dar mar gaya koi

hayat kahiye ki marne hi ka hai ek andaz

jigar ka soz mayassar nahin to kuchh bhi nahin

jigar ke soz se saz-e-hayat ba-awaz

koi salib pe kya soch ke laTakta hai

masih-e-waqt se puchhe zara koi ye raaz

firaq-e-yar mein har lamha zindagi hai azab

daraaz silsila-e-zist hai bahut hi daraaz

gham-e-hayat ne shair bana diya 'KHurshid'

wagarna main kahan aur shairi ka ye eazaz