kaha ye kis ne mujhe zindagi se pyar nahin

kahā ye kis ne mujhe zindagī se pyaar nahīñ

ye aur baat hai hālāt ḳhush-gavār nahīñ

bisāt hī to hai kyā jaane kab ulaT jaa.e

yahāñ pyāda-o-farzīñ kā e'tibār nahīñ

jahāñ jahāñ nazar uTThī vahāñ vahāñ tū thā

kahāñ kahāñ tire jalvoñ kā intishār nahīñ

vo kyā kisī kī nigāhoñ pe e'tibār kare

jise ḳhud apnī nigāhoñ pe e'tibār nahīñ

fusūñ-shanās huuñ maiñ rañg-o-bū samajhtā huuñ

fareb-ḳhurda-e-rañgīnī-e-bahār nahīñ

nahīñ hai koī bhī shai qabza-e-tasarruf meñ

kisī bhī chiiz pe insāñ ko iḳhtiyār nahīñ

dam-e-habāb navāzish kī is qadar bārish

gunāhgār bhī jaise gunāhgār nahīñ

nazar kā kyā hai bahak bhī ga.ī hai ye aksar

hamārā dāman-e-dil hai ki dāġhdār nahīñ

abhī to kashmakash-e-dār-o-gīr baaqī hai

abhī hayāt kā māhaul sāzgār nahīñ

mirī ravish hai alag 'tāj' merā zauq judā

adab ko bech ke jiinā merā shu.ūr nahīñ

kaha ye kis ne mujhe zindagi se pyar nahin

ye aur baat hai haalat KHush-gawar nahin

bisat hi to hai kya jaane kab ulaT jae

yahan pyaada-o-farzin ka e'tibar nahin

jahan jahan nazar uTThi wahan wahan tu tha

kahan kahan tere jalwon ka intishaar nahin

wo kya kisi ki nigahon pe e'tibar kare

jise KHud apni nigahon pe e'tibar nahin

fusun-shanas hun main rang-o-bu samajhta hun

fareb-KHurda-e-rangini-e-bahaar nahin

nahin hai koi bhi shai qabza-e-tasarruf mein

kisi bhi chiz pe insan ko iKHtiyar nahin

dam-e-habab nawazish ki is qadar barish

gunahgar bhi jaise gunahgar nahin

nazar ka kya hai bahak bhi gai hai ye aksar

hamara daman-e-dil hai ki daghdar nahin

abhi to kashmakash-e-dar-o-gir baqi hai

abhi hayat ka mahaul sazgar nahin

meri rawish hai alag 'taj' mera zauq juda

adab ko bech ke jina mera shuur nahin