kahan kahan na gaya an-suni dua ki tarah

kahāñ kahāñ na gayā an-sunī du'ā kī tarah

phir apne dar pe chalā aayā iltijā kī tarah

kisī ne muft na bāzār meñ liyā mujh ko

maiñ ḳhatm ho bhī gayā mausam-e-vafā kī tarah

jab apne qatl kā mujrim qarār paayā gayā

mujhe vasūl kiyā sab ne ḳhūñ-bahā kī tarah

sunā kisī ne to bach jā.egā vujūd mirā

bikhar rahā huuñ maiñ sahrāoñ meñ sadā kī tarah

na chāhte hue bhī muskurāne lagtā huuñ

ḳhayāl un kā guzartā hai jab sabā kī tarah

pata nahīñ thā ye din dekhnā paḌegā mujhe

ki pesh aa.egā merā ḳhudā ḳhudā kī tarah

zarā sī der meñ sab DhūñDne lage haiñ mujhe

jo pis rahā huuñ maiñ 'balrāj' ab hinā kī tarah

kahan kahan na gaya an-suni du'a ki tarah

phir apne dar pe chala aaya iltija ki tarah

kisi ne muft na bazar mein liya mujh ko

main KHatm ho bhi gaya mausam-e-wafa ki tarah

jab apne qatl ka mujrim qarar paya gaya

mujhe wasul kiya sab ne KHun-baha ki tarah

suna kisi ne to bach jaega wujud mera

bikhar raha hun main sahraon mein sada ki tarah

na chahte hue bhi muskurane lagta hun

KHayal un ka guzarta hai jab saba ki tarah

pata nahin tha ye din dekhna paDega mujhe

ki pesh aaega mera KHuda KHuda ki tarah

zara si der mein sab DhunDne lage hain mujhe

jo pis raha hun main 'balraj' ab hina ki tarah