kahan kahan pe lage zaKHm kya dikhaun use

kahāñ kahāñ pe lage zaḳhm kyā dikhā.ūñ use

maiñ kis zabāñ se kahūñ hāl-e-dil sunā.ūñ use

vo mujh ko bhuul ke duniyā basā chukā hai magar

maiñ ab bhī soch rahā huuñ ki bhuul jā.ūñ use

har ek shab maiñ yahī sochtā huuñ bistar par

jo ahd ḳhud se kiyā hai kabhī nibhā.ūñ use

anā ne ishq ke pairoñ meñ Daal dī zanjīr

maiñ naaz kaise karūñ raqs kar dikhā.ūñ use

mirā ġhurūr mirī raah kī rukāvaT hai

maiñ sirf soch rahā huuñ ki ab haTā.ūñ use

kase na ta.ana use tamkanat se tez huā

charāġh bujh gayā jo ḳhuun se jalā.ūñ use

gulāb kaise khilā.eñ agar ho saḳht zamīñ

hunar ġhazal kā ye 'shādāb' maiñ sikhā.ūñ use

kahan kahan pe lage zaKHm kya dikhaun use

main kis zaban se kahun haal-e-dil sunaun use

wo mujh ko bhul ke duniya basa chuka hai magar

main ab bhi soch raha hun ki bhul jaun use

har ek shab main yahi sochta hun bistar par

jo ahd KHud se kiya hai kabhi nibhaun use

ana ne ishq ke pairon mein Dal di zanjir

main naz kaise karun raqs kar dikhaun use

mera ghurur meri rah ki rukawaT hai

main sirf soch raha hun ki ab haTaun use

kase na tana use tamkanat se tez hua

charagh bujh gaya jo KHun se jalaun use

gulab kaise khilaen agar ho saKHt zamin

hunar ghazal ka ye 'shadab' main sikhaun use