kahan kahan se nigah usko DhunD lae hai

kahāñ kahāñ se nigah us ko DhūñD laa.e hai

kisī ke saath sahī vo nazar to aa.e hai

falak se jaise sitāra zamīn par utre

mirī galī meñ vo mahshar ḳhirām aa.e hai

fazā-e-fikr meñ vo chāñd ban ke chamkā hai

shab-e-firāq kī rañgat badaltī jaa.e hai

ḳhudā gavāh ḳhudā to nahīñ vo shaḳhs magar

usī kā naam mukarrar laboñ pe aa.e hai

kahāñ kahāñ na jalā.e navāzishoñ ke charāġh

mujhī ko ghor añdhere meñ chhoḌ jaa.e hai

vo baat zehn meñ jis se kuchh intishār sā hai

vo baat sher ke sāñche meñ Dhaltī jaa.e hai

kahan kahan se nigah us ko DhunD lae hai

kisi ke sath sahi wo nazar to aae hai

falak se jaise sitara zamin par utre

meri gali mein wo mahshar KHiram aae hai

faza-e-fikr mein wo chand ban ke chamka hai

shab-e-firaq ki rangat badalti jae hai

KHuda gawah KHuda to nahin wo shaKHs magar

usi ka nam mukarrar labon pe aae hai

kahan kahan na jalae nawazishon ke charagh

mujhi ko ghor andhere mein chhoD jae hai

wo baat zehn mein jis se kuchh intishaar sa hai

wo baat sher ke sanche mein Dhalti jae hai