kahan pahunchega wo kahna zara mushkil sa lagta hai

kahāñ pahuñchegā vo kahnā zarā mushkil sā lagtā hai

magar us kā safar dekho to ḳhud manzil sā lagtā hai

nahīñ sun pāoge tum bhī ḳhamoshī shor meñ us kī

use tanhā.ī meñ sunñā bharī mahfil sā lagtā hai

bujhā bhī hai vo bikhrā bhī ka.ī TukḌoñ meñ tanhā bhī

vo sūrat se kisī āshiq ke TuuTe dil sā lagtā hai

vo sapnā sā hai saaya sā vo mujh meñ moh-māyā sā

vo ik din chhūT jaanā hai abhī hāsil sā lagtā hai

ye lagtā hai us ik pal meñ ki maiñ aur tū nahīñ haiñ do

vo pal jis meñ mujhe maazī hī mustaqbil sā lagtā hai

kahan pahunchega wo kahna zara mushkil sa lagta hai

magar us ka safar dekho to KHud manzil sa lagta hai

nahin sun paoge tum bhi KHamoshi shor mein us ki

use tanhai mein sunna bhari mahfil sa lagta hai

bujha bhi hai wo bikhra bhi kai TukDon mein tanha bhi

wo surat se kisi aashiq ke TuTe dil sa lagta hai

wo sapna sa hai saya sa wo mujh mein moh-maya sa

wo ek din chhuT jaana hai abhi hasil sa lagta hai

ye lagta hai us ek pal mein ki main aur tu nahin hain do

wo pal jis mein mujhe mazi hi mustaqbil sa lagta hai