kahan rukenge musafir nae zamanon ke
kahāñ rukeñge musāfir na.e zamānoñ ke
badal rahā hai junūñ zāviye uḌānoñ ke
ye dil kā zaḳhm hai ik roz bhar hī jā.egā
shigāf pur nahīñ hote faqat chaTānoñ ke
chhalak chhalak ke baḌhā merī samt niiñd kā jaam
pighal pighal ke gire qufl qaid-ḳhānoñ ke
havā ke dasht meñ tanhā.ī kā guzar hī nahīñ
mire rafīq haiñ mutrib ga.e zamānoñ ke
kabhī hamāre nuqūsh-e-qadam ko tarseñge
vahī jo aaj sitāre haiñ āsmānoñ ke
kahan rukenge musafir nae zamanon ke
badal raha hai junun zawiye uDanon ke
ye dil ka zaKHm hai ek roz bhar hi jaega
shigaf pur nahin hote faqat chaTanon ke
chhalak chhalak ke baDha meri samt nind ka jam
pighal pighal ke gire qufl qaid-KHanon ke
hawa ke dasht mein tanhai ka guzar hi nahin
mere rafiq hain mutrib gae zamanon ke
kabhi hamare nuqush-e-qadam ko tarsenge
wahi jo aaj sitare hain aasmanon ke
Source:
Kulliyat Shakeb Jamali (Pg. 169)
Additional information available
Click on the INTERESTING button to view additional information associated with this sher.
About this sher
Lorem ipsum dolor sit amet, consectetur adipiscing elit. Morbi volutpat porttitor tortor, varius dignissim.
rare Unpublished content
This ghazal contains ashaar not published in the public domain. These are marked by a red line on the left.
