kahan tak koi waza apni sambhaale

kahāñ tak koī vaz.a apnī sambhāle

nazar aa rahe haiñ tamāshe nirāle

parastār-e-maġhrib na kyoñ kar ho duniyā

banāte na.e but haiñ tahzīb vaale

gayā zauq ahl-e-nazar kī nazar se

na.ī raushnī ke haiñ saare ujāle

bulāve ye phir kyoñ unheñ aa rahe haiñ

bharī bazm se jo ga.e haiñ nikāle

jo lazzat mayassar hai zauq-e-talab meñ

nahīñ is se vāqif tire arsh vaale

tū nairañgī-e-roz-o-shab se na uktā

zamāne abhī aur haiñ aane vaale

ga.ī aah duniyā se raushan-zamīrī

ki shāhīñ bane zaaġh kī chalne vaale

na nikleñge kāñTe 'bashīr' apne dil ke

agar ek do hoñ to koī nikāle

kahan tak koi waza apni sambhaale

nazar aa rahe hain tamashe nirale

parastar-e-maghrib na kyon kar ho duniya

banate nae but hain tahzib wale

gaya zauq ahl-e-nazar ki nazar se

nai raushni ke hain sare ujale

bulawe ye phir kyon unhen aa rahe hain

bhari bazm se jo gae hain nikale

jo lazzat mayassar hai zauq-e-talab mein

nahin is se waqif tere arsh wale

tu nairangi-e-roz-o-shab se na ukta

zamane abhi aur hain aane wale

gai aah duniya se raushan-zamiri

ki shahin bane zagh ki chalne wale

na niklenge kanTe 'bashir' apne dil ke

agar ek do hon to koi nikale