kahan the aise ki ab jaise KHadd-o-Khaal hue

kahāñ the aise ki ab jaise ḳhadd-o-ḳhāl hue

ba-rang-e-sabza-e-tar the ki pā.emāl hue

ġhurūr-e-mehr kā uqda khulā kahāñ jā kar

hamāre jism ki jab ā.ina-misāl hue

misāl-e-shabnam-e-āvāra hī baras ki badan

havā-e-gard-e-talab se bahut niDhāl hue

diloñ meñ aaj bhī naqsh-o-nigār zinda haiñ

vo jin ko bichhḌe hue ham se kitne saal hue

vo umr ham ne ḳhayāloñ ko ḳhvāb meñ Dhālā

vo umr guzrī to vo ḳhvāb phir ḳhayāl hue

tumhāre baare meñ ham se hamesha pūchhā gayā

hamāre baare meñ tum se kabhī savāl hue

ḳhushī se pālte haiñ apnī āstīn meñ saañp

ḳhushā ki hazrat-e-'iqrār' bā-kamāl hue

kahan the aise ki ab jaise KHadd-o-KHal hue

ba-rang-e-sabza-e-tar the ki paemal hue

ghurur-e-mehr ka uqda khula kahan ja kar

hamare jism ki jab aaina-misal hue

misal-e-shabnam-e-awara hi baras ki badan

hawa-e-gard-e-talab se bahut niDhaal hue

dilon mein aaj bhi naqsh-o-nigar zinda hain

wo jin ko bichhDe hue hum se kitne sal hue

wo umr hum ne KHayalon ko KHwab mein Dhaala

wo umr guzri to wo KHwab phir KHayal hue

tumhaare bare mein hum se hamesha puchha gaya

hamare bare mein tum se kabhi sawal hue

KHushi se palte hain apni aastin mein sanp

KHusha ki hazrat-e-'iqrar' ba-kamal hue